بعد ما كنتي انفاسي بعد ماكنتي البسمات
بعدما كانت أزهاري شذاها من شذا عطرك
بعد ماراحت الدنيا وجابت لي الهموم و جات
بعد ماكانت احداقي مكان لعزك وقدرك
بعدما يبست عروقي و«مات اللي بقى مامات»
ذكرتي عاشق حبك قتلتي قلبه بغدرك
وجيتيني على بالك.. ابارسم بالفرح لوحات
اهلي بك وارحب بك واقول القلب ينتظرك
وعلى بالك بعد بكتب بخفقات الخفوق ابيات
واقول ان السعد هلاّ بعد ما زارني بدرك
ترى ماني على خبرك علي.. اللى رضا الزلات
وبرضا لا تعذرتي وقلبه يقبل بعذرك
على .. اللي شرب ذلك وزاده من قساك آهات
وكل اللي بقوله لك من عيوني تحت امرك
علي.. اللي زرع حبك.. بعينه وارتوى دمعات
وشاف ان الجزا منك هديه اسمها هجرك
انا قلبي غدا قاسي وصرت اشري له القسوات
وابيع الرحمة لناس!! تعيش بمستوى فكرك
وبعد اللي حكى قلبي يزيدك كلمة او كلمات
وابا اصنعها مثل عقد يزين منظره صدرك
احب اوصل لقلبك كلام موعده قد فات
ترى منتي وسط عيني وقلبي للاسف قبرك
