يوم الوطن يومٍ عزيزٍ علينا
يومٍ به التاريخ سجل بطوله
يوم إن أبو تركي دفعه الحنينا
مس الشداد اللي له أدنى ذلوله
من الكويت بحفظ ربٍ معينا
رحل ولكن ما رحل بالحموله
أجّلها لين يصير يسر ولينا
والملك يرجع بعد صوله وجوله
رحل ومعه من الرجال أربعينا
اللي على الأقدام واللي برحوله
عينه على اللي بالقصر ساكنينا
ونفسه على الدار الحنونه ميوله
يدري إنها ما راح تجي بالهوينا
إلا بخطه محكماتٍ اصوله
حتى وصل في وقت عنده ثمينا
ومن خوفته لايدري أحد بوصوله
نوخ ركابه في مكان أمينا
ودعا إله الكون منجي رسوله
وخطب بربعه قال يالغانمينا
حان الفرج والنصر دقت طبوله
سرى ودخلها دخلة الفاتحينا
أبو المكارم والوفاء والرجولة
في لحظة وأهل البلد نايمينا
أجهز على خصمه بيسر وسهوله
وتحققت أحلام له من سنينا
عاشت معه وقت الصبا والطفوله
ومن بعد ذا نصرٍ وفتح مبينا
اللي بعيد والقريب اشهدوله
هذا معزي حاكم المسلمينا
أعتى الدول من هيبته أذعنوله
