ارفع الخفاق عالي يا ولد
والعبو بسيوفكم في يوم عيد
يوم ذكرى امجاد وأجداد وبلد
افرحوا به والعبوا واخذوا قصيد
مع ذكر صقر الجزيرة لي وعد
اكتب الأبيات وأجدد وعيد
ودي أقصد يوم كل به قصد
في معزي جاء مجال للقصيد
فارس مقدام ما مثله أحد
العزيمة حد وضلوعه حديد
ماثنى عزمه صغر سنه أبد
وهرج من قالوا ترى العارض بعيد
ولا ثنى عزمه بعد قل العدد
حيث ربعه أربعين ما تزيد
ما أنثنى عزمه من القل وقعد
قادهم بالعزم والباس الشديد
صبحهم والليل يطوون الجلد
لين قالوا قام زكن بالشديد
في ظلام الليل للعارض هجد
واقتحم سور على هدب الجريد
وبعد بان الصبح والنايم قعد
ذب غمد السيف عن وجهه بعيد
قال جيتك يالرياض بلا وعد
ابشري واستبشري نصر مجيد
واصطفق في نجد كله واجتلد
لين طوع كل راس فيه كيد
في عسير وفي الحجاز الياركد
كل راس فيه هاجوس عنيد
والحساء في الشرق لعيونه ورد
وطق في رجلين أبو طربوش قيد
وساد كل أسودها ذاك الأسد
واستعاد أمجاد جده من جديد
بالجنابي والمهند والزند
والخيول اللي عدت في كل بيد
لين كل مطارد عاف الطرد
وجاء لأبو تركي يفيد ويستفيد
وحد الأوطان وادعاها رغد
ما بها خايف ومطرود وطريد
وأشرقت في دارنا شمس السعد
وانجلت عنها غمامه كل كيد
ذي مشاعر حب واخلاص وعهد
من فؤاد صادق غنى نشيد
للفهد غنيت واخوان الفهد
اتخير فالمعاني ما يفيد
من سلايل هاجسي غيد جدد
من بنات الفكر ما فيهن زهيد
