القصايد سحايب والمشاعر.. هبوب
وغيمة ما تطيع الريح وش لي بها
واليماني تسجل ما تكن.. القلوب
والقصايد تسيل وينكشف.. غيبها
يوم اغني بداري يجتمع كل صوب
من حياتي الى آخر يوم في جيبها
يا قصيدي كتبتك ما كتبتك.. طروب
كلمة الروح وحروفي مناديبها
نبضةٍ من معاليقي بلحن.. عذوب
من مداهيل قلبي جيت أهلّي بها
شاعر ما يسوي من خياله ضروب
من مناهل شعوره دوم يشدي بها
ياهلا في بلاد حبها.. ما يذوب
قدرها بالقلوب وطيبها.. طيبها
غربها.. والشمال.. وشرقها.. والجنوب
كلها أرض وحده وين مبدي بها
يا بلاد خصال الطيب فيها وجوب
تكرم ضيوفها حشمة.. معازيبها
ثوبها الدين ما هي كل يوم بثوب
سيرة تحكي الحشمة وتحكي بها
عقب ما وجهها كاسية هم وشحوب
حسنها اليوم لابانت.. يماري بها
يوم دور المواجع والفتن والحروب
كل ذيب برز نابه.. يراوي بها
ويوم زادت لهايبها وشبت شبوب
دورت فارس يوفي.. مطاليبها
دورت فارس يقضي لها كل نوب
يحتمي حدها ويعيد ترتيبها
وما لقت غير قرم من كرام النسوب
من رجال مراجلها.. مكاسيبها
للمعالي طموح وللمراجل رغوب
جاء يشيد المباني عقب تخريبها
لا احتمت ساحة الميدان ما هو هيوب
كلمة الحق ينطقها ويافي بها
أبوتركي ليا لاح الخطر والكروب
أبوتركي لياشانت مشاريبها
جاء لداره وخلا كل عاصي يتوب
بيّن أطماع عدوانه وأساليبها
جالها مانشد وش دونها من خطوب
لامست نخوته صيحة.. رعابيبها
لجلها سج رجله مع عسير الدروب
الشدايد يصبحها.. ويمسي بها
جاء بصحبة رجال بالشدايد تنوب
الليال الثمينة دوم تصخي بها
راكبين الصعايب كالركايب ركوب
ذيك الأعمار ما قاموا بتحسيبها
سبلوها لوجه الله كرام الحسوب
أنفس باليقين استاصلوا ريبها
تحت حكمة حكيم ما يعيش مغلوب
الشجاعة تعلا في.. مراقيبها
وصلها يوم مالت شمسها للغروب
ردها للشباب وفارقت.. شيبها
المعادي عليه امة تشق الجيوب
تقضي الليل كل الليل بنعيبها
بارق يوم شعشع شق صدرالنصوب
خيره أقبل على الديرة.. وأجانيبها
اخضرت من زلاله ممحلات الخبوب
عوّد الطير بلحانه.. يغني بها
ما بنا ساسها طين وحجارة.. وطوب
شيده بالنفوس اللي يباهي بها
ويوم راح بجوار الله عليم الغيوب
احتموها رجال ينعم اصحيبها
احتموها عياله والجناب مهيوب
ترقد العين والرحّال يسري بها
خلو الشرع يحكمها رضاه محسوب
ماحصروا شرع ربي في محاريبها
درة حبها يسكن سويدا القلوب
فوق درب التقدم دوم نمشي بها
ما يمسّي علينا كل رجل كذوب
المعادين نكشف كل الآعيبها
علم اللي جداهم بس قلب الشعوب
موتنا دون عفتها.. وتغريبها
كان حطوا ضعاف الدين فينا عيوب
عيبنا كل نفس تميل نقدي بها
الطيور العصية فوقنا.. ما تجوب
والجوارح نعيفها.. مخاليبها
والقصايد سحايب والمشاعر هبوب
وغيمة ما تطيع الريح مالي بها
