يوم الوطن يومٍ عزيزٍ وكادي
الشعب يفرح به كما أيام الأعياد
يمرنا بذكرى تسر الفوادي
ذكرى تهيضنا على بدع الأنشاد
يوم جالها معزي بعمره مفادي
على ظهور الخيل مع بعض الأفراد
وغاروا على عجلان وقت الهجادي
يقودهم قرمٍ على الموت وراد
عبدالعزيز اللي يعوق المعادي
الضد ياقف له على كل مرصاد
وحظى بنصر الله ولي العبادي
فتح الرياض وعاد له حكم الأجداد
قرمٍ خذا حكمه بضرب الهنادي
دانت له الصعبة عقب حرب وجهاد
وقضى على أهل الشرك وأهل الفسادي
وعقب الغدر والخوف فيها الأمن ساد
ثبت قواعدها بعرف وركادي
ومن عهد أبو تركي بدا الخير يزداد
خلف له ارجال تحكم البلادي
ساروا على نهجه وكل بهم شاد
واليوم في عهد به العز بادي
عهد الزعيم اللي على الطيب معتاد
فهد عريب الساس سقم الأعادي
فهد الفهود اللي له العز منقاد
يسعى لعزتنا بكل اجتهادي
ترفع له البيضا على روس الأشهاد
نظراته ابعيده ورايه سدادي
ويا مصعب افعوله على كل عداد
ولا أنسى ولي عهده شجيع سنادي
هذاك أبو متعب حشى ما له انداد
حرٍ ولد حرٍ بروس المبادي
عوق الخصيم اليا يتحداه بعناد
والنايب الثاني كريم الأيادي
سلطان سلطان السعد قرم الأولاد
فيه الظفر والعرف طير الهدادي
عون الضعيف اللي عليه الشقا زاد
وآل السعود رجال دين ومبادي
يشهد لها التاريخ في كسب الأمجاد
وصديقهم منهم له الخير زادي
وعدوهم يلقى المذله والأنكاد
وفي سيرهم يمشون درب الرشادي
الله يوفقهم على خير ماراد
يا ربنا ياللي عليك اعتمادي
أرجوك تحميها من أصحاب الأحقاد
