كل ما قلت هون لا هب بالضمير

شفت من سم حالي واشعل القلب نار

والله انه على المولع خطير

طار عقلي بعد مالد لي واستدار

اثر بعض الامور العقل منها يطير

واثر راع الهوى يضيع الضحى من النهار

لا غرابة صحيح ان كل شي يصير

يا كثر ما حصل شي بدون اختيار

يا خسارة عشير ما صفى له عشير

عقب صبير قضاه وعقب طول انتظار

مير وهني طير قادر للمطير

كل ما حرك الجنحان بالجو طار

ليتني مثله اقدر كان حظي كبير

والله اني لاخلي نور عيني مزار

واتبعه في طريقه وين ما سار اسير

لو لحقني تعب يا طيب ذاك المسار

كيف يقدر يطير اللي جناحه كسير

ما يفيد الجناح ان صار فيه انكسار