سلام الله على اللي سلهمت بالسود وأغشتني ظلام الليل

ظلامٍ ساكنٍ تحت السهوم اللي على قلبي تصوبها

ليا منه رفع سهمه عليه ما بقى فالحيل ذرة حيل

ولا أعرف دقة تخفق بقلبي لا نظرته وش سبايبها

يجوز أنه منزل من ملائكة السماء لأرض البشر تنزيل

ليا ذكرت عجايب وقتنا لابد تذكر من عجايبها

كساها ربها اللي عن جميع الخلق نزهها سبيب الخيل

حرام أنه كما ذيل الكحيلة كلما شرت ذوايبها

أضيع في محياها مطاليع القمر ويضيع نجم سهيل

طبيعي شمسها لا بينت ما فيه شمس ألا تغيبها

إلا يا ويل قلبي حين غازل قلبها ويلٍ يسوقه ويل

تعذبني بكثر الصد والهجران والله لا يعذبها

لها دمي حلال وروحي ألها والدموع اللي على المنديل

فداها البدر لا منه كمل والشمس تفداها بكواكبها

يدللها الجمال وزادها حبي لها زودٍ على التدليل

تعاتبني بدون أسباب وهي من ليا زلت يعاتبها

أقبل من غلاها أرضٍ تدوسه بالقدم وتشرفه تقبيل

أنا اللي مستعد بكل لهجات الوفا والحب أخاطبها