ياما حلا في ساعة الضيق مسهاج
مع سهلة مافيه حي وطاها
من الورود منقشه تقل ديباج
تجلى عن النفس العليله عناها
ما حددت برسوم وحفوت وسياج
وراع الغنم من خلقته مارعاها
ممطورة بالوسم من غيث ثجاج
مشى الشفايا والخبارى ملاها
ارض خلى من دون ضجه ولا ازعاج
إلا أم سالم شاديه في عناها
تلقى الحبارى تجتول فرد وافواج
وراع الولع كل المشاغل نساها
تقضي نهارك داخل الروض دواج
بين الخزامى اللي تفوح بشذاها
تكز وضحاً لونها يارق العاج
حتى ولا برغش بوقته قناها
والشمس لاهقت وسارت بلادراج
شبيت نار تصطلي من سناها
تحت النجوم بدون لبمات وسراج
وقلطت صفرا معتني في سواها
متخلص من كل حاسد وهراج
اللي لحوم الناس بأثمه كلاها
حلو الكلام وقلبه اسود من الصاج
وليا بدت لك حاجةٍ ما قضاها
هذا هوى قلبي وكيفي وما احتاج
ومناي جعل النفس تاصل مناها
