ايه يا الجفن صارت ليلتك سرمديه

ودع النوم لايطرى عليك النعاسي

لين مد القصيد من البحور الرهيه

يستوى لك وتلقى به موان ومراسي

والليالي ولو بارت وصارت رديه

ومرة الوقت يصفي لي ومرات قاسي

ما خذلتك وفي دمي تفوح الحميه

ولا اذكر اني لبست لباس ماهو لباسي

وعلم اللي يبي يالوقت ثنيه يديه

إن راسي صعب واموت ما انذل راسي

الجبل ما تهزع للرياح العتيه

لو تحاول تهزه طول الايام راسي

والقصايد ما نشريها ولاجت هديه

مثل ناس تبي تطلع على كتوف ناسي

لانظمنا القوافي جت جواهر نقيه

وشاسع الفرق مابين الذهب والنحاسي