دن القلم وادواه واكتب جوابي
فوق ابيض القرطاس شعر منقيه
واقول يالله دلنا للصوابي
عبدك لجابك يرتجي منك تنجيه
واطلبك يا مولاي حسن المآبي
وارجيك ياللي ما بعد خاب راجيه
ادعوك ثم ارجوك تجزل ثوابي
في ماقف ما هم غال لغاليه
يا لله طلبتك يا عزيز الجنابي
تديم عز الدين واللي يواليه
يا لله يا منشي ركوم السحابي
ترحم حكيمٍ صار للدين حاميه
عبدالعزيز اللي مشى بالصوابي
الين وحد مملكتنا بأياديه
وقت مضى ما فيه بيض الثيابي
حر وبرد وجوع لا شك قاويه
يا لله عسى جزاه يوم الحسابي
في جنة الفردوس وبها تجازيه
وعياله الّي حللوا للنشابي
لين السعودي صار كل يداريه
حموا وطنهم عن امتان العلابي
خلوا وطنهم مزهرا في روابيه
ترى السعودي صار مثل الجوابي
يشرب وغيره يابسات نواحيه
مرتاح بال وكل شئ له يجابي
الخير عنده وافر في مخابيه
وله المدارس فتحت كل بابي
تبي ولدها في وطنها تربيه
شبابنا يا حي والله شبابي
وسط المدارس والمصانع تلاقيه
ما احلى بنات المملكة بالحجابي
هذا فضل حكامنا نفتخر فيه
لي ديرة مضيت فيها شبابي
حظيت بخير والمشاريع تاليه
كلية فتحت بليا عذابي
في قلب وادي سدير زانت روابيه
المملكة بسهولها والروابي
اذا انتهى مشروع هذا يباريه
تطور ملحوظ ما له حسابي
الأمن والتشريع ما احدٍ بناسيه
تمشى لحالك بالذهب ما تهابي
واللي نوى مكروه عجز يسويه
جملة بيوت وعقبها قلت شابي
صلوا على المختار لي مر طاريه
