يانجد يوم الله لطف فيك ودعك
بيدين من مبداه حفظ الودايع
اللي رفع فوق الثريا مواقعك
اللي جعل ذكرك بها الكون ذايع
افنى شبابه بك وهالحين طلّعك
واظهر شبابك لين صرتي روايع
النادر اللي مولع بك وولعك
اللي يسوق النفس لرضاك طايع
سلمان بن منهو بيمناه طوّعك
عبد العزيز اللي للارواح بايع
امن حدودك عقب ما الجهل روّعك
امنك عقب السوق فيك القلايع
ما عاد يطري الخوف عقبه ومنّعك
سيّل دمه ما عاد تطري الهزايع
وحلمٍ مضى لك صار هاليوم واقعك
عز الله ان الحلم ماهوب ضايع
يا نجد يا نجد الشيم زان مهجعك
وغنت لك الورقا بعذب السجايع
من يوم سلمان الوفا الشهم يدفعك
لمستقبل مشرق وزاهر ورايع
بالعين شفتي وان بغيتيه سمّعك
ان الصعيبة لابغاها تطايع
والحمد للي يوم راف ابك ودّعك
بيدين من مبداه حفظ الودايع
