مجنونة الزين.. هذا الدرب بهذلنْي
تعبت اسجْ القدم.. وامشي على اعصابي
عن حلمنا العذب.. نصف العمر.. يسألنْي
أكاد اشق الستر.. وامزق ثيابي
ما أدري وش اللي من اعذاري يجملنْي..؟
قلت انعثر حظ..!! قالوا منكسر نابي..!!
لكن الأيام تبديني لجاهلنْي
ماتدري الناس.. لكن ربي ادرى بي
طبعي عن الموقف المشئوم يعزلني
وأنا الذي للحضور اسجل غيابي
والله لولا الهجوس اللي تبلني
ما أدور لـ عزلتي في رأس مرقابي
كم من نهار شعور الغبن زلزلني
وسقت القدم مع سفوح جبال وهضابي
وأصيح يا «أحبابي» الفرقاء بـ«تقتلني
وتضجْ روس الهضيب «أحبابي.. أحبابي»
وكم قلت جعل السحب تقرب تضللني
وهبّت سموم الهجير وزودت مابي
والعبرة اللي تريحني وتخذلني
من حرْها شيبت بي.. والنظر شابي
وكم ليلة في سماء نجومٍ تعلني
بيّت في مرقبي لين القمر غابي
ودي وحوش الخلاء تقدم وتأكلني
وليا ناظرت حالتي صارت من اصحابي
مجنونة الزين.. أنا أكثر شي مزعلني
رضيت بالموت.. عيا الموت يرضى بي
