قبل اعرفك ياحبيبي كانت ايامي ضياع
وكنت تايه في زماني ماحسبت حساب يوم
وكانت سنيني تسابق للنهاية في صراع
ماحسبت حساب دنيا زايله ولا تدوم
تايه كني سفينه خانها عزم الشراع
في وسط بحر تلاطم موجه العالي يزوم
ومن عرفتك ياعيوني ماتمنيت الوداع
بأول الحجه سكنتي خافقي دايم ودوم
وشفتك وزاد انبهاري بأول الهجره وضاع
عقلي وقوة جناني وارتخت فيّ العزوم
شدني فيك وفتني حسنك وزين الطباع
كان ياحلوه زعلتي ادري بقلبك رحوم
اتمناها سعاده معك من دون انقطاع
والأماني ماتساعد بالملمات القروم
الهوى يابنت عندي تضحيه غربه متاع
لاتلوميني تراني صرت عاشق ومهموم
لو دريتي وش بقلبي من هواجيس ونزاع
وان نفسي ياغزاله عن هوى غيرك تشوم
قلبي القاسي لغيرك لان في حبك وطاع
ومن يلومن في هواك عل حظه مايقوم
وانا في عذري تراني شامخ شهم شجاع
حتى لو جيت اعتذرلك عزتي فوق العلوم
حتى لو تبغي عيوني آمري وأمرك مطاع
لاتظنين اتراجع عندك بوقت اللزوم
