انا كذا.. مرتاح من بعد فرقاك
خل الزمن يمحا الجروح القديمه
منتب تقدّر حب من كان صافاك
عطاك حبه والوفا والحشيمه
مغليك وعهود الغلا كلها اعطاك
مخلص معك.. ولا انت نفسك سقيمه
تفداك روح اللي صدق يومه اغلاك
وفضلت غيره.. لين شفت الضليمه
حطمت يالمغرور حبك وخلاك
رغم الغلا قفّا.. بصبر وعزيمه
لو مات من حبك.. فلا تحسبه جاك
يدوس قلبه لو سكنت بصميمه
شفني لقيت اللي على الحب يسواك
اهدا لي احساسه بنيّه سليمه
معه نسيت جروح حبك وذكراك
عقب الشقا عشت الحياه المقيمه
نساك قلبي عاف وقتك وطرياك
ياوش تبي من بعد هاذي هزيمه
رح داري انك نادمٍ من سواياك
ماعاد لك في قلب الاحزان قيمه
