محاورة

محاورة

هذه المحاورة جرت بين الشاعرين الكبيرين الشاعر عبدالعزيز البادي رحمه الله والشاعر الكبير حمد المغيولي رحمه الله.
* عبدالعزيز:

سلام والعلم يم اللي يجيب العلوم

واثنى التحيه عليكم ثم اغني ابها

أقولها مسلمٍ لله اصلي واصوم

اضرب طريق الشريعة كان تدري بها

* حمد:

ذعذع عليك الشمالي عقب لفح السموم

اهلين يا شاعرٍ جابه وأنا اجيبها

يا صايم الدهر بانت عليك النجوم

افطر عسى نيتك ما يختلف غيبها

* عبدالعزيز:

يالله.. يالله عسى حظ المعاني يقوم

يجيبها اللي درسها في تراتيبها

يا قلبي اللي من اللوعه غشته الهموم

والنفس تقبل هواجيسه وتقفي بها

* حمد:

ما طاب لك طاب لي والنفس مثلك تشوم

والطيبه طيبه روحي تهلي بها

لعل عينك سليمه ما تجيها الهزوم

لا تشتكي ساعةٍ طافت مشاريبها

* عبدالعزيز:

كم ليلةٍ ما لقى الجلاب حيٍ يسوم

كلٍ ليا قال سمها قال مالي بها

اشكي عدم والعرب ما يعذرون معدوم

ادري بها وأنت يالعراف تدري بها

* حمد:

يا للي جلبت المثل غلطان ما له لزوم

من يجهل الطيبه كثر عذاريبها

هيا.. تكلم على ما طاب وأنت مخدوم

بين لنا هرجةٍ بالليل نسري بها

* عبدالعزيز:

أنا احسبني محلي وأثره ديار قوم

كلٍ بغاها وأنا يا حمود ما صخي بها

ما ودي انه يضيع الحق عند القروم

يظهر على السالفة ناسٍ تهذري بها

اختيار / زهران عون الله المطيري - بريدة
* المصدر: ديوان: شعراء عنيزة الشعبيون الجزء الثاني

أعلـىالصفحة

رجوع