اقول لك مما جرى منك مشكور
يومك نويت الصد..يازين..وش صار
عذّبت قلب في محبتك مجبور
وخليتني كني على حامي النار
الهم زار وكنت من قبل مسرور
وصارت حياتي كلها هم وافكار
حسبي عليك اطفيت من قلبي النور
لوله جناحٍ كان مما جرى طار
بالحيل انا اللي من تصرفك مقهور
ضاعت بي الحيلة وضاقت بي الدار
ما انته عل اللي صار يازين مأمور
لا لا تقول اللي حصل بيننا اقدار
من بين كل الناس حطيت لك سور
وخليت لك عندي معزة ومقدار
وحطيت قلبي لك على الباب ناطور
خايف عليك من البلاوي والاشرار
ولاجلك تحملت المهونات والجور
ومن شان عينك صرت اسطر لك اشعار
ويا للاسف حبلي مع الوسط مبتور
وبستان حبي مات مابه من ازهار
وخيبت ظني واصبح الحب مقبور
وهدمت بايدك ما بني لك من اسوار
ودفنت حبٍ عاش له عدة اشهور
وأقفيت ما عندي من الحب تذكار
