أنا ابا انشدك عن شي يعرفونه جميع الناس

متى ما سرت يالغالي تشوفه تحت رجلينك

عجيب لا انقطع راسه يجي بافمك بلا مقياس

نبي حله على صفحة تراث الله لا يهينك

بعد ما شفت لغزك يالتميمي دق بي هوجاس

وعرفت بلغزك المعروض اناديني على دينك

ترى حله بلا شك الطريق بصادق الاحساس

ويا واحد من الشعار فالطرقه مخاوينك

هلا بك.. والامل يا صاحبي بدد ظلام الياس

هلا بك.. والرضا جعله بعد يسعد لك سنينك

على لغزك وتجديدك لك الله تستحق الكاس

ما دام ان «الطريق» اذعن وحقق لك نياشينك

انا اقول الطريق اللي الى منك حذفت الراس

يصير الريق وسط افمك وناظر حلي بعينك

تشيل «الطاء» من كلمة «طريق» وينكشف لا باس

على ها للغز في صوغه وشكله تسلم ايدينك

هلا يالي كتبت اللغز صغته من القدم للرأس

وما قصرت يا صالح وفيت وتسلم يمينك

ترى الطريق هو حل اللغز يا قاطع الارماس

ومن ضيع طريقه نشف ريقه والله يعينك

هلا بالصفحة اللي كنها الدره بعقد الماس

وهلا يا صالح بلغزك عساها تسلم يدينك

تريد الحل في صفحة تراث وقلت لك لاباس

ما دام ان «الطريق» اللي نشوفه شافته عينك

ترى لغز التراث اللي لنا في صفحة القرطاس

طريق لامشيته لا تهاب ان قادتك عينك

طريق لا كتبته نقطع الطاحيث لها راس

يجي باق الحروف الريق بفمك طالت اسنينك

اباشارك بحلي مع رجال الطيب والنوماس

هذا حلي مع ارجال محل اللغز موفينك

عسى يمناك تسلم يالتميمي ما يجيها الباس

ترى هذا الطريق اللي ياصالح شافته عينك

انا لي مدة غايب ولكن يا الاخو لا باس

يجيك الحل مني والجزيرة بيني وبينك

ترا هذا الطريق اليا حذفت الطا قطعت الراس

وبعد الحذف يبقى الريق، هذي هي مضامينك

الا يا مرحبا يا شاعر حير جميع الناس

كتبت اللغز صعب يا عساها تسلم يمينك

ترى لغزك «طريق» لا ركبته فاحذر الهوجاس

وريقك زاد في فمك عسى ترجع لمغلينا

ابا اجاوب على لغز الاديب بصفحة القرطاس

واقول ان طال مشيك ب«الطريق» فربي يعينك

عساهم ينشرون الحل.. مع من حله من الناس

ودامت بالمسرة والسعد يا صالح سنينك

عساك بخير يا صالح.. وجارك كاسب النوماس

لعله يعجبه وتشوف حل وافي بعينك

وش احلى منك يا عقد من الياقوت والالماس

حذفنا الطا حسب رسمك بها اللوحة وتلوينك

هلا بك يا التميمي عد ما تكتب على القرطاس

وعدد ما تستمع بذنك وتقدا الدرب في عينك

قريت اللغز مثل الناس واشغل فكري الهوجاس

ان كان انه طريق فكل خلق الله مقرينك

سلام الله عليكم يا رجال نكسب النوماس

واقول لكل من يبذل جهوده ربنا يعينك

حروف اللغز يا صالح ليا كتبت على القرطاس

حذفت الحرف الاول من طريقك تسلم يمينك

هلا بك يالتميمي يابن عبد الله صيب الرأس

عسى ربي يمدك بالعوافي طولة سنينك

طريق زاد في حده يصيب مجربه بنعاس

وليا منك حذفت الطا تطعم ريق مسقينك

قريت اللغز يا صالح وانا شوفه قوي الباس

بذلت الجهد في نظمه عساها تسلم ايمينك

لقيت الحل بالكلمة الى مني قطعت الراس

يصير الريق ملزوم تحطه بين فكينك

انا برسل لكم حل واشارك مع حلول الناس

عساهم ينشرونه بالتراث اتشوفه بعينك

وانا حله لقيته كان وافق عندي الاحساس

طريق الناس بالصحرا وبالديرة مخاوينك

سلام الله عليكم يا بوعبد الله عريب الساس

قريت اللغز بالصفحة عساها تسلم ايمينك

ترى حله طريق فوقه العالم تسير اجناس

بعض ناس تصبحك وتعض ناس ممسينك

هلا بك والمشاعر صادقة لتراث والاحساس

وعلى قول بدعته قلت لك لاشلت يمينك

وحل اللغز ماجا به هواجيس ولا وسواس

«طريق» تسلكه يا صاحبي وتشوفه بعينك