سريا قلم في مهمة شبه رسميه
وأبدع جداد المعاني والفخر ليه
ومهمتك عن نظام السير وأخطاره
وكثرة ضحايا الحديد الانتحاريه
والأمن مسؤول عنه المجتمع كله
لكن على الطيبين أكثر أهميه
ودام المواطن يُعدَ الضابط الأول
أنا وما أملك فدا للدار هذيه
ونسبة حوادث نظام السير لا زالت
تزداد في كل يوم بكل وحشيه
والسرعة الزايدة .. من كل متهور
سبب رئيسي للأوضاع الدماويه
ولو كل سايق يقدر غلطه السرعة
ما كان نسبة حوادثنا خياليه
كم غيب الموت غالي والسبب حادث
واللي ورى حادثه سرعة جنونيه
وباسم المآسي وباسم اليتم واللوعه
والفقد والوجد وآهات الغلاويه
وباسم الاحبة ولم الشمل والألفة
نخاطب أهل العقول بكل جديه
كم ثروة مهدرة وأنت أعظم الثروة
وكم معاق وجريح بكل صحية
مجروح تبرا جروحه لو بعده مدة
ومجروح تبقى معه طول الزمن حيه
وش ذنب من ينتظرك ويرقب الساعة
حتى يكون الجزاء غيبه نهائيه
اعمل حساب الصغير ليا انكسر عزه
والدمعه اللي تحرق خذ حوريه
وليا عملت السبب ما يلحقك شرهه
ما دام الأقدار مكتوبة وغيبيه
والحملة الأوله تأهيل للسايق
من حملة الأمن في محو الغشاميه
ولمواجهة كل مستهتر ومتهور
لابد من حملة أكثر صرامية
شعارها ردع من لا تردعه نفسه
عن حرمة الغير والغارات الأرضيه
وتقضي على اللي يفحط في شوارعنا
اللي يعاني من الحمى الخلاعيه
وواصل مسيرك وخلك حاضر البالي
واعمل حساب المطبات الصناعيه
واحفظ قواعد نظام السير فالطرقة
وإليك بعض الوصايا التكنولوجيه
احذر من الليموزين مروع الغافل
اللي يبيع الحياة من اجل ربيه
واحذر تكلم مع الجوال يا سايق
وألا تراسل رسايل لا بريديه
واحذر من السايبه واللي مسيبها
السايب اللي يضحي لاجل ركبيه
والاتجاه المعاكس لا تقرب له
وخطورته دايم على المعاويه
والددسن اللي معه درزن بصندوقه
لا ينشحن دام فيه حبال أمنيه
والفحص مطلب على المسيوق والسايق
ما فيه شيء بلا مدة صلاحيه
شيك على موترك واحضر طلباته
ولا تشتري إلاّ قطع غيار أصليه
باكر ليا جيت تبغى بيعة الموتر
ما يختفي شي قدام الشريطيه
وليا غلبك النعاس وقلبك معيي
وقف ولو أنت في أرض خلاويه
ما دام نايف يدير الامن بأفكاره
لا يلحقك شك فالأوضاع الأمنيه
وهذا حزام الأمان لنجد واتباعه
وسيف الشريعة ليا هبت شماليه
وختامها يا طويل العمر واليمنى
أنا وما أملك فداً للدار هذيه
وسلامة الدار هذي من سلامتنا
وبوجودكم كلنا فخر وغناويه
والله يعز الوطن في ظل رواده
رواد الأمجاد وأنصار الحنيفيه
