سلام الله عدد سود الليال وبيض الأيامي

على فيصل ولد خالد من أولها وتاليها

فضله ومعروفه من الهند إلى الشامي

على الاجناب والاصحاب قاصيها ودانيها

هلا يا مرحبا بك بالنيابة والهدف سامي

الحنها واهجرسها وارددها واغنيها

أشوف النور قدامي واشوف النجم قدامي

وأنا أقول الثقيلة ما لها يا كود راعيها

عسى عيدك تعوده يا ولد خالد مية عامي

وأقول وطلبة الله تازن الدنيا وما فيها

نبى نبدا السوالف والسوالف سوقها حامي

وطيب السالفه من طيب رجال بدا فيها

آمين الله يدوم وجودهم حكام الاسلامي

جبال كل ما هب الهوا تذري مزاريها

تهيض يا أحمد الناصر وقد الخام بالخامي

ليا شبيت نارك يعلم الله ما نطفيها

حلمت البارحه حلم عساك تفسر أحلامي

حلمت ان الجبال أزوال تمشي فوق رجليها

يباريهم ثمان عيال ذا جايع وذا ضامي

ولا تاكل ولا تشرب ولا أدري ويش محييها

صدق حلمك وانا شلت الرصاص الحرفي حزامي

والا حققتها بالعين زانت لي مراميها

إثر فرعون يوم انه بنى في مصر الأهرامي

يسوي له سويا ما حدٍ غيره يسويها

أظن الصحف طويت وجفت كل الأقلامي

عسى ربي يعود في مياهن مجاريها

أحد يحكم بحكم أبيض وأحد في حكم الاعدامي

وأحد ما يفهم الواجب وأحد ياخذ ويعطيها

أنا وانت وردنا الجمه اللي تروي الضامي

ولا يمديك تذبحها ولا يمديك تحييها

السلام ابتدي به قبل مبدا اللحوني

يا سلامي على اللي يستحق السلامي

لو عيونك تشوف اللي تشوفه عيوني

كان للبندق أم خزام تملى الحزامي

عد ما لاح براق الحيا فالمزوني

مرحبا بالنيابه عن رفيع المقامي

شايف اللي تشوفه والعرب علموني

لو تصيح وتشق الثوب ما نته ملامي

كان هبت هبوب الريح عقب السكوني

هذي اللي عليها طول يدها سنامي

واغبوني على هاك السنه واغبوني

يوم نذرا الدوا فوق الجراد التهامي

كل سلعه لها فالسوق سعر وزبوني

مار عودت دون السوق مدري علامي

ما أسمع إلا الحمام اللي يجر اللحوني

مار وثق حزامك يا وثيق الحزامي

كيف طقوا يدي بعصيهم واشتكوني

ويش أسوي بعاقلهم قليل الرحامي

ليتهم بالهروج العوج ما علموني

كان ماخذت يوم وليل جيعان ضامي

جعل رأسك على طول الدهر ما يهوني

أنت منصور واسمك من خيار الأسامي

ما دخلنا بيوت مقرقعين الصحوني

مار هذي حلام مفسرين الحلامي

دبرت الله في خلقه والمقدر يكوني

وان سكتنا مصيبه مخطر النار حامي

والليالي تراهن يخلفن الظنوني

ما تعرف السلوم ولا تعرف النظامي

اسر يا ليل لين الصبح يبدي سناه

لين راع العلوم يصفي حسابها

يا خلف لا تشيل طويق يم الحصاه

أترك الأرض عنا تمسك ترابها

إسر يا ليل والمعنى على مستواه

والمعاني على الغرات يسرى بها

ما نشيل الجبال ولا نبالك وصاه

خل هضبة رديع ممرح رابها

ما تخون الرفيق ولا شقرنا عصاه

خنجر حدها مضمون ونصابها

كيف تنكر كلامك وانت تشهد علاه

كان عفت المدينه غيرك أولى بها

أسر ليلك وخل الذيب ما قاد شاه

لا تعرض علومٍ مانت في بابها

انت حجتك عميا ودعت في صفاه

ما تمس الخيام إلا من أطنابها

سجدة السهو شرط من شروط الصلاه

من يغير صلاته بعد صلى بها

يا خلف كم سمعنا من كلامك عداه

البعارين دايم عوج أرقابها

صاحبي لو يطول الليل ضيع جداه

ما تعرف الخبول إلا من أكنابها

وسع الصدر وارد العد واقضي رشاه

لا تموح الدلي بايدين جذابها

صاحبك عجزت الشعار تلحق مداه

انشد الفزعه اللي تفتل أشنابها

والله إنا نعاف الموت مار الحياه

ما ضمنا مشاكلها ولا أسبابها

عايشٍ لك بجوٍ صافي لك هواه

غردت لك حمام الورق وأسرابها

لا تحرك ضمير مقبلا بك وفاه

نوم الفتنة اللي شفت مشعابها

يوم صفت عتيبه فوق جسر القناه

ما بقي من عتيبه غير شعابها

يا خلف لا تحط الفقر مثل الغناه

أذكر الله على القبه ومحرابها

ما علانا جناة وما عليكم جناه

عان من ما تعرف النجم يغتابها

نلحفك بالكوم ونلحفك بالعباه

حافظك من سباع البر وأنيابها

خلها حبة ندرج عليها الرحاه

بعد ما بات الأصحاب باصحابها

انت غايب وأنا حاضر وعلمي تراه

أقنع الناس حاضرها وغيّابها

يالرحى دوري له واملحي له عشاه

وش نصيبي من البذرة وحلاّبها

عودت يا حبيب مثل قدر وغطاه

الثعالب علينا تركز اذنابها

كان قصدك لبنها فدوتك ما نباه

من جناها مع عياله توصى بها

يا خلف لا نطق العود يطلع لحاه

خلنا نستر القيفان بثيابها

كل ما جيت أرده قام يسحب خطاه

يستر الله على العربان باسلابها

ما يبى إلا على الصابر صباحه قناه

من عجوز تصافح له بمنسابها

الشجاع المخضرم من يعود وراه

لين يعرف سهومه وين مضرابها

اليدين الطويله صار فيها حفاه

والعجايز تكيل التمر في عيابها

الله يعنيك يا فهد با بن نعيم

فالليلة اللي كلها خير ومطر

أنا بغيت أذبحك مار الله كريم

يمكن يجيك العفو من والي الأمر

يا الله يا والي يا ريّف يا رحيم

عز الله اني طحت في علة نحر

مانته بذابحني وانا قبلك خصيم

الحمد لله لا خلاف ولا خطر

الجدر ما يبنيه رجال غشيم

خلك مهندس والحجر فوق الحجر

ماتت حليمة مار ما ماتت عقيم

جابت لها خمسة عيال في شهر

الليل هات العلم والراي الحكيم

عندي خبر يا للي معك علم وخبر

تحمد الله ما بهم واحد يتيم

لو انهم يا صاحبي خمسة عشر

جنب عن الخط السريع مع القديم

واربط حزامك وادع دعوة السفر

وان طعتني لا تصبح إلا في القصيم

ان جتها من فوق والا من حدر

مابه طريق إلا الصراط المستقيم

واليا مشيت الدرب لي وجهة نظر

وانته مسافر قدمنا ولا مقيم

ترا حجازك ما وراها إلا البحر

لو جيت ابحلفك بالله العظيم

حلفتها لو أنها موت حمر

خابرك يابن روقي شيطان رجيم

صار بك في جنبك حبيب بالأبر

ما نته محلفني وأنا منها سليم

واللي يبا يحلف بلا مله كفر

استغفر الله يا ولد عبدالكريم

أنا وابن عمي خوان من الظهر