عشقت القمر حيث القمر ينبعث به نور
وأخص الليالي البيض تزها ويزهنه
وأحب الهوى لاهب من خايعٍ ممطور
وريح النفل حيث النفل طيب الخنه
وأحب الجمالة والجمالة عمل مبرور
وأحب الغنى واعز نفسي عن المنه
وأحب الصراحة والصراحة بها مسرور
حيث ان الصراحة تقطع الشك والظنه
وأحب الكريم اللي يفرج عن المعسور
الى من عطي حتى هله مادروا عنه
وأحب الرجال العارفة وأكره المغرور
من اغتر في بعض المظاهر يغرنه
سقا الله ليالٍ ماضية قبل هدم السور
نحفر العدود ونشرب الماء من الشنه
نشوف البنات اللي اوردن كنهن الحور
مهارٍ مشاويلن بالأعياد معتنه
على الماء تشوف بيوتهن كنهن القور
كثير القبايل تقطن العد بالكنه
على البال ذكراها ياليت الليالي دور
يا ليت الليالي ماخذنه.. يجيبنه
تذكرت شيبانٍ لنا يوم حنا بزور
يحثوننا بالطيب.. والفرض.. والسنه
لو عاشوا حياةٍ قاسية في بحر وبرور
عسى الله يعوضهم بما فات بالجنة
لو دورٍ مضى من بينهم وين ذاك الدور
زمانٍ مضى له ذكرياتٍ يحلنه
يوم الذهب ما يلبسنه بدون خصور
جمال النسا ما هو من السوق يشرنه
فقدنا حياة البدو مع شوفة المظهور
ولاعاد به بدوٍ ولا الطرش له حنه
