بارك الله فالسعه والضيق ضيق
ضيق قبر وضيق صدر وضيق ناس
والمعاني شبت بقلبي حريق
حسب ما أسمع من كلام ومن حساس
كن حسادي وقف لي فالطريق
والحقايق كنهن بلا لباس
والحواسد صايره تنغق نغيق
وصايرٍ فالأمر عقده والتباس
وأحمد الله وأشكره دربي وثيق
لو هرج بي من هرج مافيه باس
خل هراج القفا لينه يفيق
ويتبين قدح راس.. وقدح راس
فالملا رجال في لبسه أنيق
مير ماله عقل من شانه يقاس
غاطس ببحر الجهل دايم غريق
فالمراجل لا احتياط ولا أساس
ناقصٍ ماحسب من ضمن الفريق
كرت ساقط ما ارتفع ماجاب كاس
خاسرٍ من كان مع مثله صديق
أشهد انه من طفاس الى طفاس
وفيه رجلٍ شامخ يشبه طويق
للنوايب يرتكي من قو باس
ان نخيته صايرٍ كنه شقيق
كن مابك فيه من زود الحماس
عايشٍ باحساس دايم لك لصيق
ما انحرف لاصار في خط التماس
مرخص روحه على روح الرفيق
وبالمكارم جوف يم مايقاس
يضحك احجاجه لاطال به الطريق
ماتلون وجه ولاجابه عماس
أشهد أنه راعي الصحبه حقيق
يوم ولد اللاش بعروقه يباس
قلتها وبكيف من يبغى يضيق
تاركه لله.. مالي به مراس
وان بغيته لأقرب الوصف الدقيق
رجل ميت.. لاضمير ولاحواس
