ياللي تبي من عندي آخر قصيده
آخر قصيده قلتها عشرة أبيات
أبيات تزهاها معاني جديده
ولا ينبني بيت بلا عرف واثبات
ممكن تطالعها بوسط الجريده
بتراثنا والا بصفحة مدارات
شعر النبط شفته بحاله زهيده
لا عايش عيشه هنيه ولا مات
تشاوتوه أهل القلوب البليده
كل يشوته بالقدم عشر مرات
يلعبه الجاهل على ما يريده
ويقول أنا الشاعر ولا به مراوات
يامن بليته تنقصه ما تزيده
شوهت مضمونه بسرد الحكايات
أصبح من أسبابك ظروفه عنيده
ينهل دمعه لاذكر فايت فات
يرجي زمان فات يالله تعيده
عصر ازدهاره في جميع المجالات
يوم الرجال أهل المواقف تجيده
أمثال مرشد.. والسديري وبركات
