من نار شوق الخفوق ولاهِب اجراحه
أونست وسط الحشا من جمرها صالي
ولا بَرَد حرها ألا نسمة الباحة
ذعذع هواها وقمت آجر موالي
في جوها الشاعري حسيت بالراحه
خفف نسيمه من أوجاعي وغربالي
ونشدت عالي السحاب منين مسراحه
لعل عنده خبر عن ديرة الغالي؟!
ياالباحة اشتقت والأشواق فضاحه
ياليت تدرين وش يطري على بالي؟!
من يوم شميت ريح أزهار فواحه
قمت أتذكر زمان قد تهيالي
ذاك الزمان الذي سجيت بافراحه
واليوم دمعي على ذكراه همالي
ياالباحة انتي شبيهة بنت مزاحه
تحب طبع التغلي والتدلالي
وقلب العنا مثل طير يكفخ أجناحه
يطرد ورى أحلام في دنياه وآمالي
ياباحة الشوق روحي فيك سواحه
هاضت شجوني ونظم الشعر يحلالي
أنتي ما بين المداين مثل تفاحه
الشكل جدا جميل وطعمها حالي
