عسى السحاب يرشها صبح وعصير

وتركز مزونه على ديرة الجوف

يا الله بديميه تسوق التباشير

والعقربي بطرافها يجهر الشوف

عشرين ليله والبرد له زوابير

فوق التلال وكل وادي وقفقوف

منعقبها تربع وتزهر نواوير

ويلبس حماد الجوف من كل نفنوف

دارن به رجال الكرم والمناعير

كرام اللحا صيته مع الناس معروف

ما صكوا البيبان فتحة على الصير

وكلن يسهلي يحتري جية ضيوف

ونجر المعزب يقعد النيم ويشير

مسيارك لشبابة النار مخلوف

الكل منهم له مناخة مسايير

يسبقك ريح الهيل لا جيت ملهوف

ما تقدع الا حلوة الجوف تقدير

ولانقلط الا فطر الشيب وصنوف

على صواني مقلطة ما كما الخير

لافك قصدير المفاطيح مكلوف

ادليت وحبالي على جمة البير

آرد قراحه ما الحق النفس بحسوف

بعض السوالف مثل نقد الدنانير

عجنت بمعجون الذهب ما له وصوف

وادي النفاخ اسمه ولا احتاج تفسير

الجوف واهل الجوف تشهد له الوف

من شرب من ماها جلس ما اكمل السير

يغريه ماها واهلها وكل ما آلوف

لا قلت جوفي افتخر بالمشاهير

ربعي هل الطولات والعز والنوف

العلم غانم والمساعي مصادير

مجالسن تعمر به جلوس ووقوف

خصيت وباقي الناس من دون تقصير

جاله مجال وكل موقف له ظروف

ارضه حماره مثل خد الغنادير

نور الشمال الجوف ولا توفي حروف

عيونه عشقته والنخل والمواطير

وحصنه واهلها وكل ما به من جروف

امشرعه بابه عليها طوابير

رجاله رجال وفعلها سلة سيوف

لا قيل مسرف قلت مندون تفكير

وشلون ما اغلي الجوف وهو قطعة الجوف

للتوعيه يا ابن البلد كل تأثير

ساهم بيوم الصحه بجهد مكشوف

ترى الحضاره له مواري وتقدير

خلوا نحصّن نفسنا وناقف صفوف

كلن يمثل بيئته بكل تعبير

الصحه ابدا شي من كل موصوف