صاح الرياض وردد طويق وش فيه
وقال اسأل المصمك ونخل ومباني
وتدري عن اللي اليوم يا طويق نبكيه
والمملكة تبكيه قاصي وداني
فهد ابن سلمان اقفا وماضيه
يدق بالذكرى بكل الثواني
رحل وطيبه بعده الناس تجنيه
فهد ابو سلطان جزل المعاني
رحل وكل الشعب بالخير تطريه
وكلٍ بوصفه قال يعجز لساني
وصاح المعاق وقال مانيب ناسيه
رجل حنانه من قراحه سقاني
وش لون انساه وعيوني تلاقيه
ولو نامت عيوني بحلم لفاني
وفراق ابو سلطان مانيب قاويه
وعليه حزني والله انه قواني
عز الله اللي راح رجلٍ هقاويه
ما خيبت ظن وتحقق اماني
كم معسراً جاله همومه تباريه
وعود ولا كنه بيوم يعاني
وكم جرح من لمسة كفوفه يداويه
من قلبه اللي فاض ود وحناني
ومن حر ما فينا عنينا نعزيه
اميرنا وكل مسلم جاه عاني
ويارب تجبر قلب سلمان وتعطيه
الصبر والسلوان ويعيش هاني
وتجبر فؤاد امه من الهم تبريه
وعياله واخوانه بطول الزماني
