في راس مرقاب بعيد عن الناس
يوم اربعة خمسة نهار الربوعي
اخذت لي في عالي الرجم مرواس
وتسابقن من فوق خدي دموعي
والقلب من كثر الهواجيس منحاس
قام يتقلب بين حدب الضلوعي
علم سمعته هز جسمي والاحساس
انا اشهد انه يا جماعة يروعي
موت الامير اللي رحل طيب الساس
المؤمن المحسن كريم الطبوعي
كم واحد ينصاه من بعد الافلاس
يثني عليه بخير عند الرجوعي
يعطي الارامل واليتامى بالاقياس
في مد ذوي الحاجات ماهوب منوعي
ابن الامير اللي كسب كل نوماس
امير نجد اللي لنوره سطوعي
متسلسل من راس حماي الافراس
صقر الجزيرة والزعيم البتوعي
مواقفه يوم ان الارياق يباس
دون النصر والحق ماهو قنوعي
ولك العزا يابو فهد طيب الراس
في نجمك اللي غاب بعد الطلوعي
ولاغاب من ذكره على المجد نبراس
مثل فهد لعل قبره وسوعي
يالله عسى له مقام ومجلاس
في جنة الفردوس بأعلى الفروعي
يقطف من الاثمار في وسط الاغراس
مالذ وحسن وطاب من كل نوعي
وصلاة ربي عد ماهب نسناس
على شفيع الخلق يوم الفزوعي
المصطفى المعصوم من كل الادناس
جعله لنا يوم القيامة شفوعي
