للدار دمع جاير من ذريفه
عيّت تكف ولا تخف ادفقاته
يبكي على رجل فعوله حصيفه
فهد الندا فهد الوفا مفرداته
الموت حق ولايحٍ لك رفيفه
لابد من يوم تظلك طهاته
يمضي على خلقه فراد وصفيفه
اصدق وعد لك يالبنادم نصاته
صاح الكرم قبل البشر وين ريفه
فهد مضى والنبض فينا احسناته
ابو الخصال البيض نفسه عفيفه
كلٍّ ذكر فضله ومدة عطاته
فهد ربيع اللي شكا من خريفه
قلبه قبل بابه يهج ادرفاته
فهد ملاذ اللي حظوظه عصيفه
دهره حداه وضيعه في قساته
فهد صخا يمناه لو هي كثيفه
يخفيه عن يسراه وينكر لذاته
يالله عسى جنانٍ وظلٍ وريفه
منزال ابو سلطان.. لذة مباته
يابو الفهد لاشك فقده كليفه
فلذة كبد والبكر تبقى غلاته
جتك المشاعر صدقها طاب كيفه
حتى المواسي لك يواسي وساته
الله يلبسك الصبر يا وليفه
ويجبر عزا قلبك يبرّد حماته
حب الملا لسلمان ماهو خطيفه
بذر الصدق ميّزه نبت ازهراته
وترجمت حزني بالقوافي الخفيفه
سلعة مقل والعذر من خطاته
