مرحوم يا للي فوق الاكتاف شالوه

ما باق الا صورته بالجرايد

فهد طويل الباع للعود ودوه

جعله بجنات النعيم البرايد

تكفون كانه يسمع الصوت نادوه

حل الموادع للقلوب الودايد

فهد أليا عدو هل الطيب عدوه

عليه من سلمان طبع وعوايد

واسم الأمير بعالي المجد حطوه

يوم له باعٍ مع الطيب زايد

ياكثر فزعاته لناس أليا جوه

ما تنحصي من كثرها بالعدايد

فهد كريم الكف اهل نجد سموه

ما هو من اللي يجمعون الفوايد

ومن كثر معروفه على الناس حبوه

دون السعودي يعترض كل كايد

ماصك بابه دون ناسٍ تنصوه

مشروع بابه لكل البدايد

يا الله يا جبار تجبر عزا ابوه

سلمان ستر المعلقات القلايد

يا بو فهد ما ذقته الناس ذاقوه

واصبر لون الكبد فيها لهايد

يا سيدي ما دبر الله تناسوه

والصبر يوجر صاحبه بالشدايد

ومن مات لو تجمع هل الطب ما احيوه

وهذي محابيل المنايا صوايد

وكم واحد قبلك بغالية عزوه

ومن عاش بالدنيا يذوق النكايد