يا والله .. اللي مات.. يالربع رجال
ليت الليالي مهلت في حياته
يا واللّه.. اللي راح ما عاد ينطال
حدر الثرا باقي لنا ذكرياته
يجبر عزا سلمان.. في زين الافعال
رب على المخلوق..يفرض .. صلاته
فهد توفى صدق لا شك لا زال
طيبه ومعروف الأمير وصفاته
مرحوم ياللي سنته ينفد المال
ما هوب دور الحول يرصد زكاته
عدو دراهم ما خلق يقضب ريال
اسم الكرم مربوط في طبع ذاته
صبح الربوع اللي مضى حزنه جبال
يا حول ياهاليوم ما اقشر حلاته
حنا خسرنا والمقابيل تكتال
الشخص لا وقف مناياه جاته
لكن فهد مثله فقيده على الحال
ياقل من غيره يسوي سواته
يافي.. بميعاده.. ويصدق ليا قال
وينشد وش الشاكي ويقضي شكاته
طلعه بعيد هناك في روس الاقذال
الين حقق بالرجال.. امنياته
حبه رسم بقلوب اهل نجد تمثال
واللي وراء الخفجي دروا عن سماته
يدفع ركابه مقصده كسر الاميال
بس القدر عيا وصارت وفاته
يكفيه ذكر ابيه موروث الابطال
الى افتخربه مالحقته شماته
فهد رحل عنا ويبقى له اطلال
في ذمتي ما تنمحي ذكرياته
