هذي هي الدنيا كفى الله شروره
كم واحد منها تجرع بالامرار
مهما صفت مهما تتابع سروره
لابد تعقب للمسرات باكدار
ويا سعد من فيها تبصر بدوره
واخذ حسابه قبل يعمن الأبصار
وشورى على اللي يقبلون المشوره
يحذون حذو اللى له المجد تذكار
كل الوطن ذكره رسخ في صدوره
مرحوم يااللى بعد موته له أذكار
يا فهد يا اللى غيب الدهر نوره
سبحان من قسم على الخلق الاقدار
من عقب ابوسلطان في حسن صوره
طلق المحيا يكرم اصغار وكبار
ويعرف جميله كل منهو يزوره
مفتوح بابه للبعدين والجار
اصبح مع ا للي ساكن في قبوره
دبرة إله الكون علام الاسرار
يا الله عسى في القبر يلقى حبوره
ويوسع الله منزله مد الأبصار
ويبدله ربي قصور بدوره
واهل اخير وخير حيثه م الاخيار
وجعله يفوز وجعل تلقاه حوره
حور تهلى به تشادى للاقمار
في جنة خضرا مساه وبكوره
بغرف عليّة تحتها تجري الأنهار
ويا جعل نفح المسك فيها بخوره
ويشرب من ا نهار طويلات وغزار
ويا الله عسى من سلسبيل طهوره
في جنة المأوى مع الحور وأبرار
من فقد ابو سلطان ضجت بحوره
وضجت راوبى نجد مع كل الاقطار
وضج الحجاز وساكنين ثغوره
وباقي الوطن كله وسكان الأمصار
حيثه من اللى ينفقد في عصوره
في وقتنا شكله صعيب في الاحرار
وللشيخ اعزى يجبر الله كسوره
يجبر عزا ه بفقد محبوبه البار
يا سيدي سلمان عالي وكوره
تشكر مواقفكم على كل ما صار
صمدت يا سلمان وقت الضروره
ووقت الشدايد غالب الناس يحتار
وكل عنا لك بالعزى مع شعوره
وابدوا مشاعرهم مواطن وزوار
سلمان ياجالى الدجا وانت نوره
قدرك رفيع بين بادى وحضار
يا جعل نجد في بقاك معموره
وعمرك يطول بعز ما صابك أضرار
أنت الأمل وأنت السند وانت سوره
انته ونجد مثل باب على دار
ويارب تجبر من لفقده حروره
يجبر عزاها الواحد النافع الضار
ام الفهد عند الشدايد صبوره
والله يجير اللى على الحزن صبّار
والله عن الباقين يصرف شروره
سلطان واخوانه طويلين الأعمار
في ظل شيخ عامرات قصوره
مقصد جميع الناس من بر وابحار
عساه يسلم طوّل الله دهوره
ابو فهد ذخر البلد وافى الأشبار
