يا نجد عزي طيب الصيت سلمان
عزيه لاهنتي بموت الفقيده
عزيه في موت الفقيده كحيلان
نجل الامير اللي دروبه حميده
فهد بكى فرقاه حضر وبدوان
ما الومهم يبكون هاك الوليده
شيخ فتح للطيب بالفعل بيبان
وواصل فعول اهل الفعول التليده
حر فرض نفسه على القاص والدان
بافعال يمنى ما تحوش الزهيده
ريفٍ اليا ضاقت ووجه الزمان شان
وملجأ اليا بار العضيد بعضيده
خط بكتاب الخير والعز عنوان
ما تحصي افعوله بيوت القصيده
ورحل عسى له جنة الخلد مسكان
يارب حقق كل شي يريده
ندعي عسى المولى يمده بغفران
ويدمح قديمات الذنوب وجديده
هاذي هي الاقدار تدبير رحمان
الله يسوي مايبي في عبيده
دنيا وكل اللي على صدرها فان
اللي يقيم اليوم باكر شديده
مادام فيها المصطفى نسل عدنان
والا دايم الا الله والامر بيده
عبّرت عن خافي خفايه بقيفان
ومشاعري نشرتها بالجريده
ابغى اليا عرضت على طير حوران
او شافها صدفة عساها تفيده
بعض القصيد يبدد افواج الاحزان
وبعض القصيد ان راح حزنك يعيده
يارب تحفظ ذايع الصيت سلمان
وتمد في عمره سنين عديده
وتجبر عزاه بصبر وافي وسلوان
وعنه النكد تجعل دياره بعيده
قلته عسى ما اقرب لزله ونقصان
لو ان عبدالله نقوصه اكيده
واعذر عن التقصير او زلة لسان
وتدوم في خير وحياة سعيده
وصلاة ربي عد ماهل هتان
وماهز نسناس الشمال الجريده
وما سال بامر الله شعاب ووديان
على رسول الله اصلي وازيده
