في عالي الرجم قمت أصيح وأنادي
وانخا رجال الوفاء اللي نارهم حيه
ناديتهم بالنداء في روس الأشهادي
الصوت الأول لشعار السعوديه
وصوت بثر صوت بالتلفاز والرادي
لكل دوله مسماها خليجيه
ناديت شعارها والبادي البادي
والعلم يا اهل المعرفة ذات أهمية
لازم يلقى اهتمام وجهد واجهادي
ويحتاج يا أهل النظر نظرة خصوصيه
المشكلة كلها بإدارة النادي
قلته وعندي على الأمثال ماريه
نشوفها شوف ياحامد وحمادي
وسط المجلات هذيه وهذيه
شعر يغث الكبود وحادرٍ وادي
ما فيه معنى وسيسانه تجاريه
بغيت أجامل وقلت انقولها عادي
النشر يحتاج له شهره وماليه
وما عم كل الصحافة والله الهادي
نقدر نقول الخطا سبعين بالميه
وأنا على القيل والله حدني حادي
شاعر وعندي على الموروث غاريه
اكبر خطا لايضيع اتراث الأجدادي
شعر النبط شعر أهلنا قصور مبنيه
فيه الحكم والدلايل نورها بادي
ماهوب ثوبٍ على الرجال عاريه
شعر الحداثه حدث من واحدٍ غادي
لا وزن لا قافيه بلواً سماويه
مادام ما هو مسام ولاهو اشدادي
يازين تركه مابين الشمس والفيه
والخاتمه حدني يا اهل الوفاء حادي
شاعر وعندي على الموروث غاريه
