يامن شماله مادرت في اليمينا
الطيب المحبوب راعي المواصيل
طبع الكرم ناشي معه من سنينا
شيٍ نشوفه والمخبا كما السيل
طلق الحجاج محيي المقبلينا
مفتوح بابه مدهلٍ للرجاجيل
أنا اشهد انبه ياعرب شارتينا
ماهيب في غيره قليلة بها الجيل
عطفه على المحتاج والمستحينا
ماهو تصنع لا عطا يوفي الكيل
وعلى الصغير ارحم من أم الجنينا
بالعطف والترحيب يبدي له القيل
جانا الخبر قالوا رحل وش بيدينا
ما ينتعوض رمز وأشهر من سهيل
مافيه عذروب ولافيه شينا
حيل الله أقوى باليالي المقابيل
سبحان رب داير الفلك فينا
هذا قدر مكتوب مافيه تبديل
ذكرى الوفا والطيب والمحسنينا
ذكرى المصيريعي من الشرق لا النيل
ياخوي اصبر واطلب الله يعينا
واطلب من الرحمن عفوٍ وتسهيل
ياخوي ماقصرت بالوالدينا
عطفك وبرك مايبيله تحاليل
الله يثبتكم بحق ويقينا
وانتم ترا نور الليال القناديل
يرحمه رب عالم كل حينا
وفي جنة الفردوس عالي المنازيل
حيثه من أهل الخير والطيبينا
ياما وقف وقفات تنزف بها الحيل
وصلَّوا معي ياقوم ياسامعينا
على نبي كمَّل الحق تكميل
