ياعاذلين القلب ما جاه كافيه
كفو ترى عيني تزايد سهرها
أسهر وقلبي لاهب الهم يشويه
همٍ شوى حِدْب الضلوع وسعرها
من امي اللي ليلها مامرحت فيه
عقب المطيح، الكسر صار بظهرها
سلامتك يانور قلبي وغاليه
ياشجرةٍ جادت بطيب ثمرها
أنتي ربيع العمر واجمل معانيه
كنز الحياة انتي وغالي دْررها
عمري بدونك موحشات لياليه
تظلم حياتي لاتوارى قمرها
لو اكتب احساسي بالاشعار وابديه
فيك المشاعر كيف بس اختصرها
قدرك كبير ويعجز الشعر يوفيه
كل القصايد فيك ينضب بحرها
ماينجحد معروفك اللي بذلتيه
فيما مضى والنفس باول سفرها
اليا سهرت الليل قمتي وسهرتيه
ولجلي حياتك ماحسبتي الخطرها
وان صاب قلبي هم عني حملتيه
والهم لاصاب القلوب اعتصرها
أرفع يديني واسأل الله وارجيه
ينجيك من شر الحياه وكدرها
واقول ناديني واجاوبك لبيه
طاعتك عز النفس واكبر فخرها
