ايه راجع.. مثل ما قالوا: معايد قريتين

اتفق همه مع عاثر احظوظه.. واخذلوه

والا انا ما ساقني لك كود شوقي والحنين

مثل من ساقوه ربعه للمنايا.. واتركوه

عذري اني.. ماني اول من رجع صفر اليدين

ولاني اخر خلّ.. خلاّنه على الزلّه حدوه

لاني بعابر سبيل.. ولاني بطلاب دين

شاعر خاوى هجوسه للنشايب.. وانشبوه

والله اني كنت ناوي قطع شكي باليقين

لكن جروحي تخاوت كل جرحٍ باثر اخوه

وانت تحسب ساعة تمحي تجاعيد السنين

او توفّي حق من ضحى بعمره.. كلّبوه

تدري ان العشق ما يمرح ديار العاذلين

والهوى ماله وطن بقلوب ناسٍ عذربوه

ويا وجودي وجد من وقفت بعينه عبرتين

بين ناسٍ لو يباع الضيم بالمال اشتروه

وجد من كلّه تنثر.. من شمال ومن يمين

والعواذل كلما لملم شتاته.. بعثروه

الزمان استكثر الفرحة على وجهٍ حزين

والليالي ما تعدت كونها.. حلم ام عتوه

بيننا صار الهوى.. طفلٍ يتيم الوالدين

لا تهنّا من حليب امه.. ولا من وجه ابوه