سولف ترى الضيق من بدري محاصرني
وأنا الى ضقت صمتي يفتح أبوابه
والصمت لو اتوارى به يفسرني
ما دام صمت الحزن والبوح متشابه
أقربهم اللي بلحظة صدق بعثرني
على دروب الشقاء في نزف وكتابه
وأبعدهم أقرب من احساسي الى اشعرني
انه ضروره وغيره يكفي غيابه
ياما تساميت عن بوح يزوّرني
لو السحابة تصب الديم لأعشابه
إما على صفحة الواقع يصورني
وإلا تكون الجُمل سوداء ومرتابه
والشجرة اللي بنبع الماء تبشرني
لو العطش هزها ما تدري الغابه
من دونها الصدر للحطاب ناذرني
والفاس ذيب الشجر بيدين حطابه
وما دام صدري على الطعنات عاذرني
يا طعنة الظهر يا جرحين وذيابه
واللي ورى الليل يكسرني.. ويكسرني
ومع طلعة الشمس يهدي شمس كذابه
الكسر الأول عن اللي عقب يجبرني
لو ينغرس بالضلوع السيف وانصابه
أنساك يالهم من طيبك وتذكرني
قبل ابتدي بالوصال المر تبدابه
تصفح وجيه خلق الله تدورني
ياللوفاء اللي قلوب العالم أولى به
وألقاك من وين ما أوجّه محاصرني
وأفضل الصمت دون القول واسهابه
