الليل سترٍ للقلوب العشاشيق
والليل هم ما توصف وصوفه
في مشاهده فرحة وفي ظلمته ضيق
وأنا أدري أنه للمولع كلوفه
عزي لناس بالمحبة مغاريق
عايش مع الأيام والهم جوفه
وجدي على اللي عالق بالمعاليق
ذاك العشير اللي يحني كفوفه
وادع وأخذ معه القلوب المحاريق
في وقتي اللي ما تساعد ظروفه
اتخيله في ظلمة الليل وأفيق
وقلبي يشوفه قدم عيني تشوفه
من أول بيني وبينه مواثيق
واليوم نفسي بالهموم معسوفه
حظي كما طير شلع بالمسابيق
أقفى ولفحات الهبايب تلوفه
أصارع الدنيا بليا توافيق
والوقت في وجهي تلامع سيوفه
ياليل في ظلماك سقت الطواريق
والشعر في جوفي تجدد حروفه
