يا فلان ما كنت احسبه جت مواريه
والموجعه جت في درق سابقتها
معاد تنفع يا عميلي مشاريه
من يدمح الاولى جحد تاليتها
والسيل ما اغنى عن حضوره طواريه
والنفس ما اهدت ضيقها من سعتها
ومرباعك اللي له زمانين تطريه
ألفى على جرد الضلوع ونبتها
ضوت مجاهيمه على صدر مقريه
والضحكة اللي لا زمتني سبتها
وبيحت مكنون الرجا في محاريه
لكن عيلات الخوافي.. ذرتها
ومن باعني في ضيِّق الوقت ما اشريه
ونفس تبيع احلامها ما شرتها
والذيب ما خيَّب هقاوي مساريه
والمذهبه ما ترتجي.. ذاهبتها
ومن لا كسب والنعم لاحل طاريه
ما تنفعه عند اللوازم صفتها
ورجل فعوله في القسا ما تذريه
سجات ساعات الرخا ما قضتها
