ياعين.. قلبي وش اللي بينك وبينه
لا هاض فضتي وبلك سيلك هدومه
يا عين وقتٍ مضى وشلون تبكينه
وش له طريح الهموم يراجع همومه
الشين زينٍ لا صار إنه حفظ دينه
والزين شينٍ إلى من خابت علومه
والصاحب اللي يعيش الموت في عينه
لا قام قامت جموع الخلق مرغومة
يا طيب ريحه ويا لطفه ويا لينه
له ضحكةٍ تسرق اللي نام من نومه
كم واحدٍ هد بيت العز بيدينه
وكم واحدٍ شاد بيت الذل بعزومه
يا بنت وش هالكلام اللي تقولينه
معقولة أنسى جروح الأمس وكلومه
تبيني انسى سنين المر ومنينه
واحن وارجع واقول البنت مظلومه
لا واللي احيا الخفوق بدم شرايينه
ما ارجع ولا اشره على مثلك ولا ألومه
قد قلت لك قبل اعرف الجرح وسنينه
والله ما اخاوي رديٍّ ضيع سلومه
حلفت لترك ثقيل الدم والطينه
وارفع عن الذل ثوبي واطوي كمومه
ويا عين.. قلبي وش اللي بينك وبينه
لا هاض فضتي وبلل سيلك هدومه
