وش غلامٍ لا ضواه الليل يسري

ولا تشوفه لو يمرك بالنهار

نوب الساري على الثنتين يغري

ويخلفك نوبات من خلف الستار

فيك أرحب يا سعد ببيوت شعري

وسط صفحة للوفا صارت شعار

وحل لغزك فيه راع العرف يدري

ذاك «صوت» ما نبي زود انتظار

مرسل حلي بليل السبت بدري

للحميدي بعد طول الانتظار

با لليالي قالوا ان الصوت يسري

صوتك اللي ما تشوفه بالنهار

الله اللي عن خفايا الناس يدري

يعرف أسرار الكبار مع الصغار

وان بغيت اقول يا أهل اللغز مدري

كيف جا «صوت» الصغار مع الكبار

كل ما هب الهوى بالليل نسري

قلت: يا بحر الندى وين المحار

أنهض «الأصوات» لجل الناس تدري

واخبر المشتاق في عرض البحار

يا سعد لغزك على الممسين يسري

من بغى منهم يجيه النوم طار

لا رفع به كل مطنوخ يهذري

لا رفع بالصوت في تالي نهار

كاتبين الحل والتحليل بدري

عارفين القاعدة حول المدار

بالحلول الصايبه يالقرم نحري

حل لغزك صوت ما فيه احتكار

عد ما غرد على الأغصان قمري

مرحبا واللغز صغته باقتدار

هاك حله مع تحياتي وشكري

ذاك «صوت» ما على حلي غبار

جو حايل دايم للبال يطري

وما حلا الشملي وبقعاء مع قفار

تغري الشاعر يحل اللغز بدري

والاجابة صوت من خلف الستار

مرحبا ما هش غصن الصيف قمري

والسكوت لبعض خلق الله انكار

وان قرينا اللغز بالألغاز ندري

وكل صوت لا ضواه الليل سار

يا سعد في لغزكم اشغلت فكري

يوم جبت اللغز في بيوت اقصار

صح لغزك يا سعد واهديك شكري

كان ما هو الصوت قدمت اعتذار

امتأخر يا سعد ما جيت بدري

وانت لك في مجلس الحشمة وقار

اسمع الأصوات من بقعاء ولا ادري

هي يمين الزلفي او هي من يسار

مرحبا بك يا سعد والحل يطري

ويتمثل واضح مثل النهار

صوت يسري.. والقمر بالليل يسري

بامر من بدل دهرها بالخضار

يا عميل الخير جاك الحل بدري

بانت حلولة كما شمس النهار

مع تحياتي وتقديري وشكري

الجواب الصوت ما فيه احتيار