أنا اسمي ماهو اسمي أنا لغز ترى من حين

ينادوني بدر لكن بدر مخسوف من حيني

أنا اسمي يكون الحزن أو اني واحد من اثنين

غلطت بدنيتي أو ضعت ما بين أحباب اثنيني

أنا حكاية طفل محروم طفل تايه مابين وبين

ألم شكوى ألم رجوى ألم مابيني وبيني

أنا رواية أسى دايم بكتها كل عين وعين

شواهد حرفها عبرة ودموع تغتصب عيني

أنا نثر وشتات أزمان بلا معنى ولا تدوين

تداعى كل ما فيها وفيني ضاع تدويني

أنا شعر وشعور اللي تمنى نغمة وتلحين

كلامي لا كلامي فاد ولا نغمات تلحيني

أنا مسرح غريب أطوار غريب الكون والتكوين

فصولي مرتع للناس مرايا لكل تكويني

أنا أنتي سألتيني أنا منهو أنا من وين

وأنا حتى أنا أسأل أنا منهو وأنا ويني

أنا أدري بعد ما أنتي قريتي شعري بتبكين

خسارة كيف خليتك بطول العمر تبكيني

لي الله لو بكت عيني أبدعي وارفع اليدين

وأنا من وين مايممت أبشكي وارفع ايديني