سيدي من وين اببدأ بالقصيدة؟
وانت فعلك خطها عنك وقراها
وجات منشورة على صدر الجريدة
بسمك الغالي ينور في سماها
شاعر ما قال كل اللي يريده
فالبيوت اللي نقاها.. وانتقاها
قالها من صدق واحساس وعقيدة
والمشاعر بيحت خافي خفاها
سيدي يا راعي النظرة البعيدة
لك غلا صدق القلوب ولك وفاها
والمعاني كلها دونك زهيدة
من ذكر بعض الحروف ومن نساها
كل بيت فيك من طيبك تزيده
وكل معنى فيك، من شخصك تباهى
المدايح والكنايات.. العديدة
لو تصير نجوم.. صار اسمك فضاها
كيف.. تبلغك المدايح والنشيدة
وانت بافضال المكارم من وراها
وانت رأيك صفوة الارياء السديدة
وانت نفسك بالوفاء ربك حباها
بين كل الناس وقفاتك فريدة
مالها غيرك.. ولا غيرك سواها
كم صدور من بعد عطفك سعيدة
وكم عيون خير معروفك غشاها
كل ساعة وانت لك وقفة جديدة
مبتدأ جود النفوس ومنتهاها
يالله المعبود.. يا منجي عبيده
القلوب المؤمنة تقبل دعاها
تحفظ اللي دايم افعاله مجيدة
والمكارم منه من يلحق مداها
شيخ اهل نجد الامير ابن الوليدة
لا كتب بالعدل كلمة ما محاها
سيدي سلمان.. مضمون القصيدة
فعله.. اللي خطها.. منه وقراها
