راح عني يا سعد قبل امس غالي

شانت الديرة بعد ما راح عني

اتلزى مير واعزي لحالي

والله اني بين نار وغار كني

ما هناني لا فراش ولا ظلالي

حبها فأقصى خفوقي وامتحني

دايم ذكراه خاطرة ببالي

ودي بوصله لو انه ما وصلني

يا الله ان بخير لا تجزى الليالي

فرقت بيني وبينه وابعدني

وفي هواها مرخص ما كان غالي

ما بلاي البعد والله ما شحني

آصله لو دونه دروب طوالي

مير ما جا لي على شفي وظني

وقت اقشر ويتقلب ما صفا لي

كل ما تصفا المشارب غثربني

مع خفيف الروح حظي ما برى لي

ما جداي الا التوجد والتمني

غير حبه في حياتي ما بقى لي

لو تزول الروح ما ينزال مني

يا عسى مع )...( احصل لي مجالي

غيرها كل العذارى ما فتنني

بالوصايف فايقه كل احتمالي

املكت زين العرب من كل فني

بالخدود اللي مثل برق الخيالي

والعيون اللي بنظرات سحرني

من هدب عينه على خده ظلالي

مثل عينه لا نظرت ولا نظرني

خلت المشتاق منه العقل خالي

صابني يوم اقبلت رمح مطني

كن في قلبي مثل دق الخلالي

والجروح اللي قديمه ما برني

الجروح تطيب لو تم الوصالي

عن مواصلها الرسايل ما كفني

والعذارى حبهن سقم الرجالي

والحسوفه كان مت ولا بكني