يامن شرا بالخير نفسه وباعه
للي خلقها يوم يحصن الاعمال
يامن يرجي من نبيه شفاعه
بيوم عظيم الخطب شديد الاهوال
الخير دونك باسط لك ذراعه
مجمعات الخير بجنوب وشمال
ياسعد من يطرح بسوقه بضاعه
ياسعد من يبذل دربه لو ريال
فيها رجال كل ابوهم شجاعه
الله يكثرهم على كل ابو حال
ابذل قبل لاتسترد الوداعه
المال مالك قبل لايورث المال
ارحم يتيم راعه اليتيم.. راعه
دمعة على خده كما السيل همال
يبكي الى ناظر وليد الجماعه
يلبس جديد الثوب، وثيابه اسمال
يقول يمه والله انه فضاعه
وراي ما البس ثوب وشماغ وعقال
واظهر نهار العيد كلي نصاعه
مانيب مثله يمة اليوم رجال
وشيخ قضى عمره تهجد وطاعه
ضاقت يده وافلس من اقراب وعيال
ضعيفة حاله ومر متاعه
والهم في صدره له اقفاي واقبال
عنده على ضيق المعيشة مناعه
عفيف نفس كان عمره ولازال
ورملا تهل دموعها كل ساعه
مايندرا عنها ولاتشكي الحال
مستورة محتشمة في طباعه
تقطعت فيها عن العالم حبال
يامن لذولا بعد ربي طماعه
ماعلقوا في غيركم بعد آمال
يامن شراء بالخير نفسه وباعه
للي خلقها يوم يحصن الاعمال
ابذل قبل ماتسترد الوداعه
المال مال الله يامغلي المال
