يا أعز وأغلى من جميع الطوايف
وحيدي اللي ما أمتلك غيرك أخوان
تدري حبيبي ليه سميت نايف
اخترت أنا أسميك نايف على شان
تطلع مثل راع الفعول الطرايف
شيخ الشيوخ اللي له المجد عنوان
حمال صلفات العلوم الكلايف
سمح النبا راع الوفا طير حوران
للضد شر وبالضعيفين رايف
سوٍ على الباطل وللحق ميزان
درع البلد من كل طامع وحايف
عز المواطن والوطن بين الأوطان
ستر البنات المترفات العفايف
وظل الرجال اللي لهم بالوغى شان
من يزبنه ما بات ممساه خايف
بالعكس يمسي داله البال فرحان
كم جاه مهموم من الوقت عايف
وأقفى ماكن الوقت له لحظةٍ هان
كلٍ لفعله واضح الجود شايف
ترفع له الراية على رأس ما بان
تشهد عليه الأزمنة والصحايف
تاريخ مجده حافل عبر الأزمان
المدح في شرواه ما هوب زايف
للصدق في مدحه دلايل وبرهان
يوم إن بعض الناس مدحه حسايف
من يمدح بنايف فلا هوب ندمان
وفي سيدي للمفردات الترايف
وصف جديد للقوافي والأوزان
