ياحفيد معزي الدار وسميه
ياعضيد سعود ياواف الخصايل
لك مقام ولك سلام ولك تحية
عد ما عدوا عن جدودك فعايل
عد ماحنّت وغنّت راعبية
وعد ماقالت هلا للضيف حايل
عد ماطاب الرشيدي في خويه
وعد ماسال القهد واروى الثمايل
من هواجس شاعر نفسه رضيه
شاف ماله عن رضا حايل بدايل
شاعر يامير جابته الحميه
وحدته تكفى على بدع المثايل
وفززه نبض العروق الحاتميه
ونومسوه بفوزهم شهب الفنايل
عاد نادي طي بعزوم قويه
في مكانه دايم بين الاوايل
خلوا الطائي يغني سامريه
بنت عزه نقضت شقر الجدايل
وليلة اعياده تجمعنا سويه
مع وجيه الخير وعيال الحمايل
الخطاوي عز والنيه مطيه
والرجال مجربه والشك زايل
ياحفيد موحد الدار وسميه
يابن عم سعود يازيزوم حايل
