حيلتي ضاعت.. ومع حيلتي ضاع الدليل
ما قدرت أصل مع القلب حل يقنعه
المصيبه راح عمري وانا عايش عليل
ولا نهيت النفس يرفض خفوقي يتبعه
لا متى يا قلب وأنا احتمل همك واشيل
لا متى والعمر يمضي حلوم مفزعه؟
ارحم اللي من عذابك غدا جسمه نحيل
ما ينام الليل سهران يذرف مدمعه
احسم الموقف.. وسارع قبل طفح المكيل
والرجا بالياس يا قلب لازم تقطعه
ادفن الماضي وضيمه تحت وبل المخيل
خلنا في واقع اليوم وش جايب معه
الهوى حاول.. وحاول عن دروبه تحيل
لو حلف لك بالغلا .. والوفا لا تسمعه
اتركه يا قلب ما من ورا حبه حصيل
قربها لجل المصالح ولجل المنفعه
ما عمر قالوا جرى السيل في عكس المسيل
وانت لك يا قلب طبع يخالف مطمعه
بالخيانة.. والغدر.. عنده اسلوب جميل
توهم العاشق ولازم غلاها تزرعه
ودها كل البشر رهن اشارتها تميل
تامر وتنهي بكيفه! ولا احد يمنعه
من وقع في بحرها يعتبر نفسه قتيل
لو يطول الوقت لابد يوم تخدعه
