معلوم عندي بس ما هو بمعلوم
عندك وش اللي صابني في غيابك
يا من ينام وحارمٍ عيني النوم
ضاع الأمل مني وخاب الرجا بك
منك الجفون ثلوم والحجر مهزوم
والدمع بين العين والجيب شابك
إن قلت ذا صاير وواقع ومقسوم
أقول في جنب البحر ويش جابك
زل القدم بك وانت ما تعرف العوم
غصبٍ عليك الموج هاج وغدا بك
سور المحبة بيننا اليوم مثلوم
ضيعت مع زهرة شبابي شبابك
ظلمت قلب ما سلا عنك لو يوم
قلبٍ تخير جيرتك والتجا بك
لولاك راضي كان ما يلحقك لوم
بصمة رضاك مدونه في كتابك
والله ما انت بيا اتلع الجيد ملزوم
تحرق بلحظة طيش غالي ثيابك
معذور في حالٍ وفي حال مليوم
كان الغرام اللي سطا بي سطابك
فرصة عمر ضاعت علي يابن سلوم
وما صابني من جور الأيام صابك
اخوك يا مشكاي حاير ومنجوم
يشبه عذابه في المحبة عذابك
