يا من نهارك ياس والليل مهموم
على الجريدة شفت غالي جوابك
عشره من أبياتك من الزين مظلوم
وبيتين تظهر للرفيق انتسابك
وانا يا بوخالد عن الظن معصوم
ترى حسابي ما يوافق حسابك
تمضي حياتي صبر والسر مكتوم
ويل الهموم ارخت علي السنابك
والا أنت لك في الحب خلان وخصوم
احدٍ كواك شوي واحدٍ عثابك
وأنا يفرحني ليا صرت محروم
واسعد إلى شفت الشقا والعنا بك
ما ينوصل حبلٍ من الود مصروم
ولو صحت بأعلى صوت محدٍ درى بك
إلى اقفوا الخلان ما ارتحت في يوم
ولا أهتنيت بماكلك مع شرابك
إن طعتني فانكف عنه وابعد الحوم
خل البحر وارجع لغرسة ترابك
تراك ليبدلتها صرت مذموم
وخليت ماك ورحت تطرد سرابك
وان ماقبلت الشور فالدرب مرسوم
درب الدجيما صار به مثل مابك
سيرتك لا مرت يقولون مرحوم
الله يهون ميتتك والعزا بك
