اصدقي لي يا الهجوس.. واستخيري للصحيح
تهت بدروب الخيال.. تبت من دنيا الضياع
ارفقي بي للهدوء.. واتركيني باستريح
ضاع كل اللي معي.. ما بقى ليّه متاع
ما بقى للصبر روح.. مشرف صوب المطيح
ولا بقى شي علي.. غير نظرات الوداع
حافي الكف ومشيت.. مالك القلب الجريح
ساعي بدنيا الشقا.. طالب درب السناع
تايه وين الأمل.. والفكر مع كل ريح
من عسير في عسير.. مالقيت أرض الوقاع
أكسر الليل ودجاه.. والخوافي ما تبيح
أضرب صعاب الدروب.. للأمل فيه اقتناع
أطرد أسباب الأمور.. راجي مطلب صريح
بالبحر شفت السفن.. والزوارق والشراع
ولا رجيت ولا ارتجيت.. ما أبي شي شحيح
يوم قصر هالنصيب.. وانتهى حلمي وضاع
والأمل قفا وراح.. ينتظرني بالضريح
قفّل أبواب السعي.. واكتسى بأسود قناع
بس وينك يا الهجوس.. تستخيري للصحيح
ضاع كل اللي معي.. ما بقى ليّه متاع
